HUMAN hapaka og kontrobersiya nga nagtukmod kaniya ngadto sa kaalautan, hinayhinay nang nakabangon sa iyang kaugalingon ang sikat nga boksidor sa nasod nga si Prince Albert Pagara.
Si Pagara, kinsa adunay 33-1-0 nga rekord sa professional boxing, giaresto niadtong Septiyembre 3, 2021 tungod sa reklamong pagmolestiya sa usa ka 14-anyos nga babaye sa Barangay Inayawan, dakbayan sa Sugbo.
Hinuon gibuhian niadtong Septiyembre 8, 2021 ang kanhi sakop sa nanira nga ALA Boxing Gym human kini nakapiyansa og P100,000.
“Ok na sir, nakabalik na ko’g training para sa fight within this year. Sa pagkakaron, giingnan pa ko sa akong manager sa Dubai nga December 1st or 2nd pa siguro among duwa didto. Nangayo sila og kasiguroan kon makalarga ba ko o dili. Pero makalarga ra man ko, ingon akong abogado,” matod ni Pagara sa interview sa Sports Ta Bai sa Radyo One Cebu 90.1 FM.
Gibutyag ni Pagara nga iyang gihimong usa ka dakong hagit ug motivation ang maong isyu nga mihapak kaniya.
Ang 27 anyos nga Pagara anaa sa Villamor Brothers Gym mipahigayon sa iyang inadlaw’ng ensayo.
Dili bag-o alang kaniya ang iyang trainers nga ang managsuong Edito ug Edmond Villamor sanglit mao usa kini ang nag-agak kaniya sa dihang sakop pa siya sa ALA Boxing Gym.
Mapasalamaton si Pagara sa Villamor Brothers Gym nga bukas ug abli kini gihapon bisan pa man sa mga nahitabo kaniya. (JBM)