Dear Noy Kulas,
Good day to you! Tawga lang ko og Mila. Sa 2019 mi gikasal sa akong bana but kadiyot ra kaayo ang among courtship tungod kay tingali puro mi broken hearted, naka decide ming magpakasal bisan wa kaayo mi magkaila og maayo.
Human sa among kasal, nag-anam anam na og lutaw ang iyang tinuod nga batasan. Seloso kaayo siya ug maoy hinungdan sa pirme namong conflict. Manapat pa gyud siya, Noy Kulas. Just recently, akong nahibaw-an nga duha sa akong friends iyang ex-es. Akong gi-ask ang duha ug ilang gi confirm but ilang gibuwagan human sila nakahibawo nga duha sila. Ilang description sa akong husband kay salbahis nga playboy.
Naa pay usa ka babaye nga nisulti nako nga nag abort siya kay gi force sa akong bana.
Gamahay ko nganong nagdali ko og minyo. Maayo gani kay wa pa ko momabdos karon kay mas pait tingali ang akong experience. Naa pa ra ba siyay batasan nga di magpabalibad og sex kay kon mo-refuse ko, masuko. Unsa kahay akong buhaton?
MILA
Mila,
Sa atoang balaud, di ka mapugos nga makig sex sa imong bana kon wa ka sa mood. Ang pagpanapat abuse usab busa kalapasan sa balaud. Mahimo nimo siyang mareklamo sa inyong barangay ug magpa blotter ka sa kapulisan, sa Women and Children Protection Desk kon ganahan ka og discreet nga paagi. Gamita ni nga mga balaud aron di makapangabuso nimo ang imong bana. Ayaw pagpinareho sa ubang mga asawa nga nagpakahilom ug nag-antos na hinuon og maayo.
Dangop sab sa iyang pamilya kay basin makatabang sila nimo. Apan kon di sila manginlabot, sama ubang mga hitabo, adto ka na sa imong pamilya sandig. Ayaw kahadlok sa pag confront sab niya sa imong nahibaw-an. Ayaw usab paabuso aron iya kang respetuhan, kana kon di sab siya hanggaw.
Pag-ampo sab nga mausab siya ug proteksyunan ka gikan sa kadaut.
NOY KULAS
kulassuper@sunstar.com.ph