KINSA kaha ang fully vaccinated individuals sa Cebu City ang makadaug sa house and lot ug brand new car nga ipa-raffle sa Cebu City Government?
Si acting Mayor Michael Rama nagkanayon pormal nilang ilusad ang paghatag og ganti sa mga Sugbuanon nga nagpabakuna karong Lunes, Oktubre 18,2021.
Gawas sa engrande nga pa-premyo, gianunsyo usab ni Rama nga adunay mga pilantropo nga mohatag og P100,000 gift certificates sa usa ka hotel, P100,000 nga scholarships, P100,000 nga balor sa groceries ug daghan pang uban.
Ang Office of the Presidential Assistant for the Visayas ni Secretary Michael Dino mohatag og mga television set ug ubang prempyo para sa dugang pagdasig sa mga mga tawo nga magpabakuna.
Si Konsehal Eduardo Rama maoy gitahasan ni Rama pag-follow-up sa house and lot samtang, si Konsehal Raymond Garcia maoy gisangonan sa acting mayor nga mohimo og dugang pakulo sa lainlaing barangay sa Cebu City para madasig ang katawhan sa pagpabakuna.
MENTERYO, SIMBAHAN
Gipahibawo ni Rama nga ang City Government mopalapad sa ilang pagpamakuna pinaagi sa pagtukog og temporaryong vaccination sites duol sa menteryo ug open spaces sa simbahan.
Matod ni Rama, ang vaccination sulod sa malls magpadayon nga moatiman sa naka-schedule sa ilang first o second dose.
Si Dr. Jeffrey Ibones, pangulo sa City Health Department, nagkanayon nga ilang tinguhaon nga makasugod na sila sunod semana apan wala pa matino kon asa nga menteryo ang ilang prayoridad sanglit kinahanglan nga dili usab kini layo sa ospital.
Ang Cebu City adunay 322,063 ka mga individual ang fully vaccinated. Nikabat sa 76,505 ang nakadawat sa ilang first dose.
Samtang 48,092 ka mga hamtong ug 4,631 ka mga menor de edad ang nakaparehistro sa Pabakunata.com.
Si Rama nagkanayon nga tinguha sa Cebu City nga makaparehistro og usa ka milyon ka mga tawo nga mabakunahan ug dili mominos minos 700,000 niini para makab-ot ang herd immunity.
Ang acting mayor nipahibalo nga dili angay mabalaka ang mga Sugbuanon sanglit adunay igong suplay sa bakuna ang Cebu City gikan sa national government para gamiton sa gustong mapanalipdan batok sa Covid-19.
Nunot sa no vaccination, no entry policy sa lokal nga kagamhanan uban sa Archdiocese sa Sugbo alang sa mga sam-ang nga pribado ug publiko sa dakbayan atol sa pag-obserbar sa kalagkalag, Nobiyembre 1 ug 2, ang Cebu City Police Office (CCPO) hugot nga mag-monitor sa posibleng pagpalusot unya sa mini nga vaccination card.
Ang kapulisan moabag usab sa paghan-ay sa tradisyon nga pagpanagkot sa sam-ang ug ilang hugot usab nga pagpatuman ang standard health protocol batok sa Covid-19.