NABALAKA na sab ang mga local government unit kay nagkagamay na ang mga tawo nga nagpabakuna. Ang pagminos sa gidaghanon sa mga tawo nga nagpatusok nadungan ning nagkaminos nga gidaghanon sa nangasakit og Covid-19. Basin nangkompyansa sila tungod kay migamay na man ang nangataptan og Covid dinhi sa Sugbo.
Nakita usab tingali sa mga tawo nga bisan nabakunahan na, natakdan gihapon sa virus nga duna nay isog ug mas mananakod nga klase. Duna say nangamatay bisan nabakunahan, apan lahi ang ilang kaso kay duna man silay gihambin nga mga sakit.
Unsa may makuha sab sa mga bakunado? Dunay mga establisemento nga nagtanyag og mga diskwento ug uban pa. Pipila ra sab.
Maayo kay ning uwahing mga adlaw, ang kagamhanan nag anam na og palugak sa travel restrictions sa mga tawo nga bakunado. Dunay mga LGU nga mangita lang og vaccination card ug medical certificate nga magmatuod nga way Covid ang traveler.
Kini nga mga lakang maayo nga sinugdanan padung sa mas maayong direksyon alang sa mga bakunado. Makadani man gud ni sa mga tawo nga magpabakuna, labina kadtong way gana bisan kon alang nila, luwas ra. Ang nahitabo man gud karon kay ang nabakunahan naa gihapoy restrictions, sama sa way bakuna. Managsama ra ang treatment sa kagamhanan, naay bakuna ug wala.
Unta, ang kagamhanan, labina ang mga LGU mopaluag sa mga rekisitos sa pagbiyahe sa mga tawo nga bakunado. Hatagan og mga prebilihiyo sa kagamhanan aron madasig ang publiko sa pagpabakuna sa una ug ikaduha nga doses.
Kay kon ang gobiyerno di motanyag og mga prebilihiyo sa magpabakuna, kinsa man kahay ganahan madapatan sa anti Covid-19 vaccine?
Kon magpa raffle sab apan gamay rang premyo kay limitado ang pundo sa gobiyerno, ayaw na lang usiki ang panahon. Mas maayo pa tingali nga makig coordinate sa private ug business sector alang sa mas makadaning mga tanyag sa mga tawo aron magpabakuna.