DAKPAN ang usa sa mga suspek nga nangrapido sa mga pulis nga nagpatrolya alas 9:20 sa gabii, Miyerkules, Oktubre 13, 2021, didto sa Lebak, Sultan Kudarat Province.
Ang nadakpan giila nga si Samirudin Pulayagan Solaiman, 22, ulitawo, samtang nakaikyas ang iyang kauban nga si Nassep Maguid Macalatas.
Matud ni Lebak Chief of Police Major Rodney Binoya nga nagpatrolya ang iyang mga sakop sa utlanan sa mga barangay sa Poblacion 3 ug Tibpuan sa nahisgutang lungsod gumikan sa nadawat nilang impormasyon nga dunay mga tawo nga katingad-an ang mga lihok.
Apan pag-abot sa mga pulis sa dapit, kalit lang gipaulanan sila og mga bala hinungdan nga nahitabo ang pinusilay una misibat ang mga suspek sakay sa motorsiklo.
Daling gigukod sa mga pulis ang mga suspek hinungdan sa pagkahulog sa kanal sa gisakyan nga motorsiklo sa mga suspek ug nadakpan ang drayber nga si Solaiman. Nakaikyas ang angkas nga si Macalatas.
Narekober sa mga pulis ang XRM Honda 125, walay plaka, relo ug mga basiyo sa kalibre .45 nga pistola ug M16 Armalite rifle.
Wala naangol sa maong insidente apan naigo ang bintana sa usa ka balay sa mga sibilyan sa dapit.
Prisohan ang gitugpahan sa suspek ug gisukit-sukit sa Lebak Municipal Police Station nga posibleng maoy makahatag og impormasyon ug madakpan ang nakaipsto niining kauban. (Edgar E. Fuerzas)