ANAA na sa Villa Funeral Parlor sa Lizada, Toril, Davao City ang patay nga lawas sa usa ka lalaki kinsa gituohang nalumos sa dagat dayon namatay.
Huwebes sa buntag, Oktubre 14, 2021, nakurat ang mga nangaligo sa dagat human ilang nagunitan ang patay nga lawas sa tawo diha sa tubig sa Kalayaan Beach, Barangay Dalaio, Toril, Davao City.
Sa report sa Toril Police Station ang biktima giila nga si Duight Quilab Dumayac, 24, taga Sta. Cruz, Davao del Sur ug kasamtangan nga empleyado ug nagpuyo sa usa ka negusyante sa Doña Manuela, Barangay Daliao, Toril, Davao City.
Gilayong gidala sa daplin sa baybay ang biktima ug gipaabot ang ambulansiya sa Central 911 ug gideklara kining patay na.
Gipailawom na sa autopsy ang patay nga lawas sa biktima. (Jeepy P. Compio)