BOLUNTARYO nga mitahan sa sabakan sa balaod ang usa ka squad leader nga sakop sa Communist Terrorist Group (CTG) dala ang armas ala una sa hapon niadtong Miyerkules, Oktubre 13, 2021, didto sa Baguio District, Davao City.
Subay sa report sa Davao City Police Office (DCPO), usa ka joint-operation ang gilusad sa Baguio Police Station uban sa elemento sa Presidential Anti-Organize Crime Commission (PAOCC), Regional Special Operation Group, City Intelligence Unit , Regional Mobile Force Battalion 1105th ug sa elemento sa City Mobile Force Companynga miresulta sa pagtahan sa nahisgutan.
Giila sa DCPO ang mitahan nga si Danny Ranan Fuentes, alyas Ka Rigor, 36, ug residente sa Barangay Tambobong, Baguio District ning siyudad.
Nasayran nga usa ka squad leader sa Squad-1 GFC-53 ubos ni Commander Bobby ug Commander Jinggoy nga nag-operate sa mga lugar sa Sitio White Culaman, Kitao-tao, Bukidnon ug sa pipila ka bahin sa Baguio District ug sa Toril District ning dakbayan.
Sa pagtahan sa nahisgutan dala niini ang duha ka Magnum 357 nga walay serial number,usa ka unit sa improvised M14, usa ka unit sa improvised shotgun ug ang upat ka mga buhing bala sa M14.
Gikataho nga gikapoy na ang nahisgutan sa bukid nga takin ang armas uban sa kahingawa sa pamilya.
Ang gitahan nga armas anaa na sa kustodiya sa Baguio Police Station alang sa saktong disposasyon. (Jeepy P. Compio)