NAGPAHINUMDOM ang City Social Welfare Development Office (CSWDO) sa Dakbayan sa Davao sa mga Dabawenyos nga itaho ang mga kabataan nga manaygon sa mga subdibisyon o bisan asa nga mga lugar, ilabi na nga ang kasamtangang Covid-19 nagdili kanila sa paggawas sa ilang panimalay.
Gibutyag ni CSWDO head Atty. Marlisa Gallo nga ang iyang buhatan nakadawat og mga taho sa mga menor de edad nga nangadto sa mga balay-balay aron mangayo og salapi human manaygon sa mga molupyo.
Kini bisan pa man nagdili ang kasamtangang restriksiyon sa mga 18 anyos ug paubos nga makagawas sa ilang balay gawas lang sa mga esensiyal nga tumong.
Giawhag ni Gallo ang publiko nga itaho kini ngadto sa pulis o kaha sa ilang buhatan.
"Ireport sila sa police or sa CSWDO. Ayaw jud hatag aron dili mobalik. Nag-tandem ang police ug social workers. I-rescue sila sa police, i-assess sa social workers kung paulion ba," tataw sa opisyal.
Gisulti ni Gallo nga kasagaran sa mga kabataan nga ilang maluwas di taga Siyudad sa Davao.
"Hibaw-an nako dili taga Davao. Naay social worker from Tagum mag-turn over daw pero pagpangayo namo sa names, dili diay taga Davao," puno pa niya.
Ingon pa niya nga pipila kanila kinsa gikan sa habagatang bahin, kinsa giubanan og mga hamtong, mohunong sa Sirawan checkpoint sa Toril ug gikan didto mosulod sa siyudad sa laing pamaagi.
Ang Bantay Dagat, matud pa niya, nagmonitor sab sa mga kalihukan niadtong buot nga moanhi aron nga mohimo og panaygon.
Ang Pasko sa Pilipinas gisaulog na Septyembre pa lang.
Base sa Inter-Agency Task Force for the Management of Emerging Infectious Diseases guidelines, nagpangedaron og ubos 18 gimandoan nga magpuyo sa tanang panahon kay gikonsidera sila nga vulnerable sector. Gitugtan lang silang mogawas alang sa mga importanteng hinungdan uban sa ilang mga ginikanan ug tigbantay.