SUPERBALITA CEBU

Babaye gipusil sa kapuyo, patay

USA ka 29-anyos nga babaye gipusil-patay sa iyang kapuyo sa lawak sa ilang gipuy-an sa dan BH Garces, Barangay Cansojong, dakbayan sa Talisay, alas 3:00 sa hapon kagahapon, Oktubre 14.

Si Janine Ubas, 29, online seller ug nagpuyo sa nahisgutang dapit, namatay human nakaangkon og samad pinusilan sa iyang ulo.

Ang mamumuno iyang kapuyo nga si Jireh Guba, 29, walay trabaho ug gihulagway sa kapulisan nga sabog o ubos sa espiritu sa gidiling drugas.

Si Police Corporal Milfred Labitad, imbestigador sa Talisay City Police Station nga nahinabi sa DYSS Super Radyo Cebu, nagkanayon nga selos ang motibo sa krimen.

Sumala sa kabanay ug mga silingan sa duha, ang lalake subra kaseloso hinungdan sa kanunay nila nga panaglalis.

Atol sa hitabo, ang duha diha sa ilang lawak uban sa ilang anak nga 4-anyos nga usa ka differently-abled child ug nag-away na usab.

Nasayran sa imbestigasyon sa kapulisan nga nakahukom ang babaye nga makigbuwag sa iyang kapuyo, apan wala makadawat ang lalake, gipusil niya sa ulo ang biktima gamit ang kalibre .45.

Human sa sipang buto sa armas, nigawas ang lalake nga nagbitbit og armas nga iyang gihatag ngadto sa igsuong babaye sa biktima.

Ang igsuon sa biktima nga si Jocel Ubas nipadayag nga nakurat dihang niduol kaniya ang lalake, gilayog niya kini apan gitahan ang armas niini.

Matod ni Jocel, ang lalake sabog sa gidiling drugas tungod sa iyang siga kaayo og mga mata.

“Pagkabuntag nag-away ni sila kay nasuko ang suspek kay nagkaon ang biktima uban sa igsuon wala daw siya agdaha, gikulata ang biktima,” matod sa laing igsuon sa biktima nga si Joy Ubas.

Tungod sa kaseloso sa lalake, dugang ni Jocel, bisan maligo ang biktima iyang kuyogan ug halos kada adlaw magtrukis gumikan sa pangabubho.

Gibutyag sa pamilya sa biktima nga si Guba dunay pending nga kasong pagpamusil.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!