KAPIN sa P62.3 milyunes nga nagkadaiyang matang sa illegal nga drugas gisunog sa Philippine Drug Enforcement Agency (PDEA) 7 sa crematorium facility sa Cosmopolitan Funeral Homes sa dalan Junquera sa siyudad sa Sugbo kagahapon sa buntag, Oktubre 14.
Labing dako mao ang methamphetamine hydrochloride o shabu nga mobalor og P47,030,077.72 nga motimbang kini sa kapin 8 kilos.
Gisundan kini sa nalbuphine hydrochloride kun nubain nga mokantidad sa P7.2 milyunes, expired nga mga regulated drugs nga mokantidad sa P208,319.60 ug marijuana nga adunay kantidad nga P20,436.38.
Matod ni PDEA 7 Director Levi Ortiz nga ikalima na kini ka higayon nga mihimo sila sa pagguba sa mga ebidensya ubos sa pagtugot sa korte sukad siya nangulo sa maong ahensya sa Central Visayas diin mobalor na ang tanan sa kapin P300 milyunes na ang ilang gipangsunog.
“Wala gyud ta anang recycling infact mao gyud na atong gihimo nag-destroy gyud tag drugs to prove na ang atong mga ebidensya sunugon gyud nato na siya kung naa nay court order,” matod ni Ortiz.
Dugang ni Ortiz nga adunay mga kaso nga nahukman na ug ang uban niini nagbilin lang og sample sa ebidensya apan mimando na ang huwes nga nagkupot sa kaso nga angayan na kining idispatsar.
Giangkon sa PDEA director nga migamay karon ang supply sa illegal nga drugas itandi sa nanglabay nga mga katuigan nunot sa padayon nga gubat batok drugas sa kapulisan ug sa ilang ahensya.
Si Executive Judge Joseph Ygnacio sa Lapu-lapu City Regional Trial Court (RTC) nga maoy pinasidunggang dinapit mapasalamaton sa PDEA 7 ug sa kapulisan sa Sugbo nga walay hunong sa ilang anti-drug operation nga niresulta sa pagkasakmit sa minilyon nga balor sa illegal nga drugas.
Nagpasabot lamang kini matod sa huwes nga ang gidaghanon sa maong matang sa illegal nga drugas usa ka pagpamatuod nga ang mga awtoridad nagtrabaho.
Nakita usab ni Judge Ygnacio nga ning padayon nga kampanya sa kapulisan ug sa PDEA sa pagbatok sa illegal nga matang sa drugas nahimong luwas ang katawhan gikan sa mga kriminalidad, sukwahi sa nanglabay nga mga katuigan. (AYB)