Vincoy: Cebu prov. luwas pa sa ASF

LUWAS sa presensya sa African Swine Fever (ASF) ang Probinsya sa Sugbo, kini maoy gipahibaw ni Dr. Maryrose Vincoy, Provincial Veterinarian sa Sugbo.

Kini bisan paman og nasakmit sa Cebu City Department of Veterinary Medicine and Fisheries (DVMF) ang moabot sa 64.5 kilos sa imported meat gikan sa nagkalainlaing supermarkets, convenience stores, ug foreign stores sa siyudad.

Matod ni Vincoy nga sukad sa pagtumaw sa sakit, gawasnon sa ASF ang tanan nga mga binuhing baboy o mga produktong baboy sa probinsya.

Subay sa naghinangat nga holiday season, gibutyag usab ni Vincoy nga subsob ang monitoring sa veterinary offices sa mga local government units (LGU) pagsiguro nga luwas sa sakit ang mga baboy sa ilang lugar.

“Two-way mana siya ang part sa surveillance pwede’g passive, pwede’g active so kanang veterinary office even if walay report sa mga constituents mag-conduct man jud na og surveillance so kung walay nibalita meaning negative ang nahitabo as ground,”matod ni Vincoy sa Oktubre 13.

Ang ASF dili makatakod sa lawas sa tawo apan dako kini og epekto kon makasulod sa lokalidad o komunidad sa mga swine tungod paspas ang pagkatap niini nga posibleng mopatay og liboan ka mga binuhi, dako usab kini og epekto sa hog industry.

Sukad sa miaging tuig hangtod karon, gipasabot ni Vincoy nga hugot nga gipatuman sa kagamhanan ang measures nga magseguro sa kaluwasan sa mga karneng baboy sa kamerkadohan.

Gipasalig ni Vincoy, dunay igong supply sa Pasko sanglit luwas ang mga binuhing baboy ug ang mga produkto sa karne sa siyudad ug lalawigan sa Sugbo. (ANV)