SUPERBALITA CEBU

Lugar nga imong ma-solo, ang 'Wooloo'

USA ka bag-ong mountain resort nga nahimutang sa bukirang bahin sa Barangay Garing, Lungsod sa Consolacion nga maghatag og kalinaw sa hunahuna ug matagbaw sa imong pagpahuway, samtang nakig-bonding sa imong pamilya o barkada.

Sa mga nagplano nga mo-unwind gikan sa kabalaka resulta sa pandemiya, stress sa trabaho o ang hustle and bustle sa siyudad, ang Wooloo Resort maoy tubag nga ikaw ma-relax, mind and body.

Sa pag-abot sa Super Suroy team sa maong dapit kami nahibulong nga sirado ang ganghaan sa pagtuo nga kanselado ang operasyon.

Apan gituyo kadto tungod kay ang maong boutique accommodation dili “open to the public.”

Nipasabot ang operations manager nga si Troy nga kini gituyo kay ang mga non-client gidid-an nga makasud, ilabi na adunay uban nga igo lang mag-standby o pagpahulagway sa lokasyon.

Buot ipasabot nga exclusive ang tibuok area sa guest nga naka-check in ug ma-solo ang pag-enjoy ang kina-iyahan ug ang katagbawan sa paggamit sa amenities.

Nakuryuso ko sa pangalan nga Wooloo og unsay pasabot niini, matod pa ni Troy nga usa ka foreign term sa “weaved” kon pagbanig-banig sa materyales sama sa rattan o kawayan.

UNSAY NAA?

Sa pagsulod pa lang sa entrada mosugat na sa imong panan-aw ang manicured lawn ug dunay pathway paingon sa suit room nga architectural structured nga payag nga gitaparan og mini pool.

Samtang buwag ang toilet, shower room kansang shower head ginama sa kawayan ug ang kusina nga mamahimong makaluto ang guest.

Bali-inspired ang theme sa maong area nga overlooking sa bukirang bahin sa Barangay Garing ug ang atbang makita ang isla sa Mactan.

Kasamtangan usa pa lang ang suite room nga mahimong kasudlan og 10 ka tawo, haom sa large group.

Plus sud sa maong lawak adunay astronomical telescope nga nagpunting sa glass nga bintana nga bantang kaayong makita ang hapit na nga mahuman nga Cebu-Cordova Link Expressway (CCLEX) ug ang bahin sa mainland Cebu ug Mactan Island.

Ang kilid nga bahin sa suit room adunay mini pool alang niadtong mahilig mag-dipping.

Adunay bonfire, tree house ug viewing deck nga nag-umbaw sa pangpang, perfect niadtong mag-meditate o kadtong mag-maoy tungod sa kapakyasan.

RATES

Gipabahibawo ni Troy ang orihinal nga room rate alang sa overnight stay moabot sa P9,000 apan nagtanyag sila karon og promo price.

Sa mga adlawng Lunes ngadto na sa Huwebes ang suite room mokabat sa P5,888 ug libre na ang brunch (breakfast and lunch). Apan kon adunay sobra nga tawo dugang P588 alang sa dugang mattress.

Sa adlawng Biyernes, Sabado ug Domingo kon weekends moabot sa P7,888, apil na niini ang breakfast.

Adunay laing option sa extra person mamahimong mag-tent sa gawas sa kantidad nga P388, bring your own camping tent.

Pasidaan ang lugar walay wifi signal o connection, busa sulit ang pakig-bonding kay walay disruption atol sa relaxation.

UNSAON PAG-ADTO?

Ang Barangay Garing adunay distansiya nga pito ka kilometro gikan sa Cebu North Road kon manukad sa Highway sa Poblacion, Consolacion.

Mas bintaha kon adunay kaugalingon sakyanan, gamit sa imong directional app dali rang matultolan ang Wooloo.

Apan sa kadtong way kaugalingong kasakyan aduna mga habal-habal sa highway nga tag-P100 ang pletehan patungas sa maong bukid paingon sa Wooloo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!