ANGAY unta ikalipay ang pagtugot sa kagamhanan sa pagbukas sa mga sinehan human kini pangsirhi niadtong Marso 2020. Dul-an na sa duha ka mga tuig nga ang katawhan naa na lang sa mga streaming site nagsalig sa pagtan-aw og mga salida, sama sa Netflix.
Bisan tuod kon makita ra sa Netflix ang bag-ong mga pelikula, apan lahi ang ma-feel sulod sa mga sinehan. Lahi ang impact ug epekto sa big screen ug sa sound system ngadto sa magtan-aw sa salida. Nindot usab nang naa kay daghang mga kauban sa pagtan-aw kay sa ikaw lang usa naa sa balay ang nalingaw.
Pabuksan man tuod, apan daghan gihapon ang restrictions nga ipatuman. Kinahanglan gihapon nga magsul-ob og facemask ug face shield ang manan-aw. Apan segurado man nga di ni matuman kay karon bitaw, unyag sulod ra man sa malls ug uban pang pampublikong mga dapit pasul-obon sa face shields, apan kon naa na sa sulod, mahug na man lang nga headband.
Daghan usab ang mga kondisyon una makabukas. Hayan langawon gihapon ang mga sinehan. Gilangaw man gani ang uban nga wa pa ang pandemic? Gawas tingali kon sikat ug maanindot ang salida kun pang blockbuster.
Buksan man gani, di angay nga dali-dalion. Kon ilakip kini sa bubble, diin kadto rang fully vaccinated ang patan-awon, naa tingali manan-aw, apan di daghan kaayo. Kay bisan gani karon nga naay mga establisemento nga nangbukas ug nagpasulod sa fully vaccinated, gamay lang gihapon ang nangaon. Lahi ra kon itandi kaniadto nga wa pay pandemic.
Inay nga magbukas ang sinehan, maghiusa ang kagamhanan ug mga negusyante pagpangitag paagi nga mas managhan ang magpabakuna. Sama sa gibuhat karon sa Cebu City nga magpa raffle aron mang-engganyo. Di angay nga magdali sa pagbukas.