ANAAY awit nga nag-ulohan og Che Sara, Sara (Italian) or Que Sera, Sera (Spanish). In English meaning whatever happens, happens or whatever will be, will be. Usa kini ka popular nga kanta niadtong tuig 1956 diin giangkon nga ang umaabot dili kuntrolado sa tawo.
Kining nahitabo sa atong pamulitika karon nagpakita nga dili kontrolado ni Presidente Rodrigo Duterte ang iyang anak, Davao City Mayor Sara Duterte Carpio. Bisan ang partido sa administrasyon nga PDP – Laban naglibog kon si kinsa gayud ang tinuoray nga molansar sa pagka-presidente. Una nilang gituboy si Presidente Duterte nga modagan sa pagka-bise presidente nga mipili kang Senador Bong Go nga maoy presidential candidate. Apan inay mo-file si Digong sa iyang certificate of candidacy (COC) mi-retire na man hinuon sa pulitika ug si Go maoy gipa-file sa pagka-bise. Wala madugay ilang gitudlo si Senador Bato dela Rosa nga maoy standard bearer sa partido PDP – Laban. Apan maklaro nga naghuwat sila nga si Inday Sara muhokum sa pagdagan pagka-presidente inay magpapili lamang pag-usab pagka-mayor sa Davao City. Hangtud karon nagsigi pa og kanta ang mga opisyal sa administration party og “Che Sara, Sara” kay nagpaabut na lang kon unsa ang kaugma-on sa ilang partido.
Hain na man ang mga tradisyonal nga partido political sama sa Nacionalista, Liberal ug Kilusang Bagong Lipunan (KBL)? Nganong wa naman kini gamita sa mga pulitiko karong eleksiyona? Ang mga kandidato sa pagka-presidente ug ang ilang mga partido mao sila si: Leni Robredo – Independent; Bato dela Rosa – PDP – Laban; Manny Pacquiao – PDP – Laban, PROMDI & PCM Alliance; Bongbong Marcos – Partido Federal ng Pilipinas; Isko Domagoso – Aksyon Demokratiko; Panfilo Lacson – Partido para sa Demokratikong Reporma; ug Norberto Gonzales – Partido Demokratiko Sosyalista ng Pilipinas.
Murag maabuso na usab kining substitution kun paghulip sa mga mi-file sa ilang COC. Ang gidudahan nga placeholder mao si dela Rosa nga suma pa naghuwat nga pulihan ni Inday Sara Duterte sa panahon sa substitution nga matapus sa Nobiyembre 15, 2021. Ang Lakas – CMD Party nagbutang usab og placeholders suma pa alang gihapon sa pagdani kang Inday Sara nga modagan ubos sa ilang partido.
Uyon akong pamub-an na kining substitution dates alang sa mga placeholder. Inay nga hangtud sa Nob. 15, maayong kutob nalang kini sa katapusan sa Oktubre kun 22 ka adlaw human sa pag-file sa COC. I-apply gihapon Ang lagda sa pagpuli sa kandidato nga mamatay sa wala pa ang eleksiyon aron maminusan na ang pag-abuso niining substitution of candidates. (mannyrabacal1144@gmail.com)