SA umaabot nga piniliay sa sunod tuig Mayo 9, 2022, ayuha jud og pili ang mga kandidato nga angay ibutang sa mga posisyon mapa-lokal o nasyonal man kini.
Ang matag usa ka boto nato importante sa moabot nga laing unom ka tuig dili lang sa atung kinabuhi kondili, sa tanang mga Pilipino.
Kinahanglan nga atung pilion ang kandidatu nga angay ug siguro ta nga makatabang gyud sa pagsulbad sa mga problema sa atung nasud ug dili sa mga kandidato nga sa panahon sa kampanya pagkadaghan ang gisaad nga daw kon siya makadaog mao ni, mao na. Storyag botbot.
Sulti sa uban nga ang eleksyon usa ka adlaw ra na. Tinuod, apan ang gahom nga imong gihatag sa imong gibotaran dili ra usa ka adlaw, tuig ang kwentahon.
Karon sa umaabot nga adlaw sa kampanya, ang mga kandidatu daghan og pakulo aron ang atensyon sa katawhan ilang makuha. Ang pinaka-bibo maoy modaog.
Di nata ana, ari ta sa kamatouran nga ang pagpangalagad sa katawhan ug sa atong nasud dili komedya nga bibo-bibohan lang. Seryuso ang mga problema nga giatubang sa atung nasud ug kana nagpasabot nga kinahanglan ta og seryoso nga lider, ug mao nay angayan!
Dili nato tan-awon ang mga nabuhat na sa usa ka kandidatu, tan-awon natu ang iyang mabuhat pa kon siya ang atong botaran sa maong posisyon.
Ka-super, ayuhag pili ha!