NAGAGIKAN sa managlahing kasinatian ang Talk N’ Text Tropang Giga ug Magnolia Ang Pambansang Manok Hotshots apan pareho sila og intensyon sa ilang pagpakigbatok og lainlaing kontra karong hapon, Oktubre 15, 2021 – pagsulod sa finals sa Philippine Basketball Association (PBA) 2021 Philippine Cup sa Don Honorio Ventura State Universdity Gym sa Bacolor, Pampanga.
Ang Tropang Giga makigsangka sa San Miguel Beermen karong alas 3:00 sa hapon samtang makigbatok ang Hotshots sa Meralco Bolts sa main game karong alas 6:00 sa hapon sa Game 6 sa duha ka semi-finals best-of-seven series.
Ning maong mga series, ang Tropang Giga ug Hotshots parehong naggunit og 3-2 nga bintaha.
Naangkon sa Tropang Giga ang maong labaw sa series pinaagi sa paglampornas sa Beermen, 110-90, sa Game 5 niadtong Miyerkules, Oktubre 13, 2021 nga seguradong nakahatag kanila og dugang moral.
Apan bisan pa niini, dili gihapon makonsiderar nga inilog ang Tropang Giga ning kombatiha.
Sa ilang bahin, ang Hotshots niadto pa untang Miyerkules adunay kahigayunan nga makasulod sila sa finals sa Game 5 sa kaugalingon nilang series apan gipakyas sila sa Bolts, 102-98.
Ning higayuna, seguradong ipagawas sa Hotshots ang tanan nilang ikabuga aron maputol ang pagpanghudlat sa Bolts.
Kon mapilde ang Hotshots, hayan seguradong motapon ang momentum sa series nga maoy giapas sa Bolts. (ESL)