NAGLARAW ang Philippine Basketball Association (PBA) nga ibalik sa Manila ang best-of-seven championship series sa 2021 Philippine Cup apan nagdepende pa kini kon motugot ang Inter-Agency Task Force (IATF).
Kon matugtan man sa IATF, aduna gihapon kahasol nga sagubangon ang PBA gumikan kay gusto sa gobiyerno nga ipatuman ang straight bubble set-up.
Ang Philippine Cup gisugdan sa Ynares Center sa Pasig City pinaagi sa semi-bubble format apan dihang gipaubos ang National Capital Region sa mas hugot nga restriksyon tungod sa Covid-19, hayan naahat ang PBA nga ibalhin sa Bacolor, Pampanga ang kombati sa komperensya.
Ning puntoha, talihuman na ang ang kombati sa Philippine Cup ug manugsugod na ang championship series.
Gumikan kay ipaubos na man sa mas luag nga Alert Level 3 ang quarantine protocol sa NCR sugod karong adlawa, gusto sa PBA nga dili na mosubay sa straight bubble set-up.
Apan wala pa’y desisyon ang IATF kon ilaha bang tugtan ang gustong mahitabo sa PBA.
“Ang nakalagay kasi doon, ‘Yes you can play in Manila, but you have to be in the bubble,” pasabot ni Games and Amusement Board (GAB) chairman Baham Mitra nga napatik sa Spin.ph.
“Ang gusto ng PBA, to play in Manila, walang bubble. So medyo may deadlock tayo ng kaunti run.”(ESL)