NAKAPUGOS og deciding Game 7 ang San Miguel Beermen human nila gibawsan pagmakmak ang TNT Tropang Giga, 103-90, sa Game 6 nga maoy nakatabla sa ilang semi-finals series, 3-3, sa Philippine Basketball Association (PBA) 2021 Philippine Cup kagahapon, Oktubre 15, 2021, sa Bacolor, Pampanga.
Human sa ilang dakong kapildihan sa Game 6, ang ginsakupan sa Beermen nagkumboya og maayo gikan sa sinugdanan hangtod sa katapusan aron likayan ang kaw-it sa panamilit.
Ang reserbang sentro sa Beermen nga si Mo Tautuaa maoy labing kuyaw nga nakaduwa sa ilang puwersa ug gipangulohan niya ang kadaugan pinaagi sa iyang 24 puntos, niamot og 19 puntos si Marcio Lassiter samtang nidugang og 16 puntos si Terence Romeo.
Sayong ningratsada ang opensa sa Beermen ug gipanghubog nila ang Tropang Giga pinaagi sa ilang three-point shooting nga naghatag kanila og dakong labaw, 53-38, sa halftime.
Sa 3rd quarter, nagpadayon ang kabangis sa Beermen hangtod nga nainat nila ang ilang labaw, 86-62, ug wala na sila molingi pagbalik gikan niadto.
Puntos matag usa:
San Miguel (103) - Tautuaa 24, Lassiter 19, Romeo 16, Santos 13, Fajardo 11, Cabagnot 9, Perez 8, Ross 3.
TNT (90) - Castro 16, Reyes 16, Erram 11, Rosario 10, M. Williams 9, Heruela 9, Montalbo 6, Pogoy 6, K. Williams 5, Khobuntin 2.(ESL)