NAG-AWAY kaniadto, nagtinabangay na karon.
Mao kini ang nahitabo sa duha ka Filipino world boxing champions nga sila si Nonito “Filipino Flash” Donaire ug Johnriel “Quadro Alas” Casimero.
Si Donaire, kinsa maoy tag-iya sa World Boxing Council (WBC) bantamweight title, maoy nitabang kang Casimero aron mahan-ay ang mandatory title defense niini sa iyang World Boxing Organization (WBO) bantamweight belt batok kang British Paul Butler.
Gikataho nga adunay bikil si Casimero sa nagdumala niining si MP Promotions president Sean Gibbons hinungdan nga nakadesisyon si Donaire ug ang iyang manager nga iya ra sab asawa nga si Rachel nga i-endorso ang lumad nga taga Ormoc City ngadto sa bag-ong promotional outfit nga Probellum.
Si Donaire bag-uhay lang mipirma og kontrata sa Probellum, nga gipanag-iya ni Richard Schaefer.
“What we did was we met with Richard and we just did what we should do for a fellow Filipino champion. To help with his career,” asoy ni Rachel sa ilang video channel Beyond the Ring nga napatik sa www.abs-cbnnews.com.
Si Jason Casimero, igsuon ug trainer ni JohnRiel, nagkanayon nga mipirma na sila og kontrata sa Probellum.
“’Yung kontrata napirmahan na nila. Na-send na champ (Donaire), ‘yung Probellum. Salamat sa tulong mo champ,” batbat ni Jason.
Nagpasabot kini nga nahan-ay na ang tanan alang sa pagdepensa ni Casimero batok kang Butler karong Disyembre 11, 2021.(ESL)