WALA pa matino sa sakop sa City Disaster Risk Reduction and Management Office (CDRRMO) sa Talisay kon kanus-a maagian sa pag-usab ang dan sa Sitio Languyon, Barangay Manipis tungod sa nagpadayong pagdahili sa yuta nga mitabon na sa agianan.
Mo kini ang gipahibalo ni Alvin Santillana, ang pangulo sa Talisay CDRRMO sa Oktubre 15, 2021.
Matod ni Santillana nga naglisod ang sakop sa Department of Public Works and Highways (DPWH) sa pag-clear sa dalan tungod sa padayong pagpangatagak sa mga bato ug pag agas sa tubig gikan sa ibabaw nga bahin sa bukid.
“Dako man gyud kaayo ang volume nga nitabon sa karsada, hilabihan na gyud karon nga zero visibility Manipis,” matod ni Santillana.
Usa na ka semana nga nasinati ang pagdahili sa yuta sa lugar tungod usab sa pag-uwan, hinungdan nga gipanglantawan sa buhatan nga molanat pa og taas nga higayon ang pagkasirado sa maong agianan.
Ang maong dalan, sagad unta agian sa mga de karga nga gikan sa dakbayan sa Toledo og ubang mga sakyanan gikan sa habagatang Sugbo.
Tungod niini, gihangyo niya ang mga motorista nga naanad nga moagi sa dapit sa pagpangita na lang og laing ruta nga maagian aron malikay sa disgrasya.
“Hinaot lang mo sabot ang publiko nga ang manipis di jod maagian,” dugang ni Santillana.
Aron dili makaduol si bisan kinsa, ang mga sakop usab sa Talisay City Police Station, City of Talisay Traffic Operations and Development Authority (CT-TODA), ug barangay tanod nga nagbantay sa lugar. (ANV)