NAKADAWAT ang Davao Regional Medical Center (DRMC) sa Tagum City og P25 milyon nga kantidad alang sa oxygen refilling station.

Mismong si Senate Committee on Health Senator Christopher Lawrence "Bong" Go ang mitunol sa tseke ngadto sa DRMC ang sa pagmuntar og usa ka oxygen refilling station.

Una niini, nabalaka si Go sa unang report nga nagkulang ang mga oxygen sa mga dagkong ospital sa Davao Region gumikan sa pagtaas sa ihap sa mga aktibong kaso sa Covid-19.

"My only condition to DRMC is (to) please help the poor patients," ingon ni Go.

Ang pagtunol sa senador naatol sa distribusyon sa Assistance to Individuals in Crisis Situation (AICS).

Daghan ang nahimong benepisaryo sa maong programa sa dapit labi na ang walang-wala nga maoy mas naapektuhan sa pandemya.

Mokabat sa kapin kun kulang 500 ka mga residente sa dapit ang nakabenepisyo sa maong takna diin gawas niini naay gipanghatag nga mga vitamins, masks ug face shields.

Naa sab gipa-raffle ang senador nga mga computer tablet, mga sapatos ug mga bisikleta ingon man ang pagtabang sa mga masakiton nga personal nga nakig-istorya kaniya.

Sa katapusan una milakaw ang senador, mihatag kini og mensahe ngadto sa mga Tagumenyos diin iya kining gidasig nga magpabakuna gumikan kini ang dalan aron luwas ang tanan sa Covid-19. (Jeepy P. Compio)