MALAUMON gihapon ang mga opisyal sa Hugpong Ng Pagababago (HNP) nga modagan si Mayor Sara Duterte sa pagkapangulo sa nasud sa 2022 elections.

Kini ang gibutyag ni HNP Regional Tresurer ug Davao de Oro Governor Jayvee Tyron Uy bisan pa man nga mipagula na og pamahayag si Mayor Inday nga di gayod kini modagan pagka-pangulo.

Atol sa press conference sa HNP Davao de Oro Chapter sa Miko’s Brew sa Tagum City niadtong Huwebes, Oktubre 14, 2021, gibutyag sa opisyal nga dako ug buo pa gihapon ang ilang panglantaw nga si Mayor Sara ang mamahimong presidente sa nasud.

"Naa pa ma'y November 15 to wait to have a decision, but gusto lang namo nga i-reiterate nga kasabot sab mi sa bug-at nga nadesisyonan ni Mayor Inday, and what ever nga na-decision, nga mag-presidente o magpabilin sa pagka-mayor sa Davao City, we fully commit and support her decision," ingon ni Gov. Tyron.

Malaumon sab si Run Sara Run convenor ug Senior Board Member sa Davao de Oro Arturo T. Uy ug mipasalig nga magpadayon ang iyang grupo sa pag-engganyo sa uban nga mosuporta kang Mayor Inday.

"We're still hoping nga mag-change ang mind nga modagan gyod siya, so Run Sara Run will continue to encourage her nga kinahanglan nga di gyod puwede nga di siya modagan, and ang Run Sara Run is one of the hundreds of parallel groups nga hangtud karon naga-encourage gyod nga padaganon siya [Mayor Sara],” ingon sa amahang si Uy.

Mensahe ni Arturo Uy kang Mayor Inday, "Mayor Sara there’s still November 15, daghan kaayo nga nag-asa atong mga countrymen for continuity sa gihimo sa imong amahan nga si PRRD.. among the presidentiables you are the best quality, qualifications nga first, mo-continue sa imong amahan, ang imong strong leadership... kung puwede lang we begging you to give a call for the majority of the people specially the Davao Region, for you to run, and definitely manalo ka talaga, andyan kami sayo and we will campaign hard when the time comes nga ire-consider nimo ang desisyon nga modagan gyod pagka-presidente."

Sa kasamtangan, si Mayor Inday anaa sa maayong kahimtang samtang gi-isolate human nag-positibo sa coronavirus. (Jeepy P. Compio)