MOKABAT sa 47 ka mga punoan sa bag-ong tanum nga saging ang nadamyos dihang nahagsa ang eroplano nga nag-spray sa mga saging didto sa expansion area sa Lanaban Farm 1, MD Rio Vista, Maco alas 7:15 sa buntag Miyerkules, Oktubre 13, 2021.
Subay sa report, nasayran nga samtang ang abyon nga dunay body number AGVAN RP R4416 nga gipalupad sa piloto nga si Captain Rotillo Fuentez naghimo og pag-spray sa MD Rio Vista aksidenteng nahagsa human sa giingong pagkadaut sa makina.
Nasayran nga naandan na sa abyon ang pagpahigayon og pag-spray sa sagingan apan niadtong higayona ang abyon naaberiya hinungdan nga ang piloto nawad-an og kontrol niini nga miresulta sa pagkahagsa.
Mga saging nadamyos human gidaro sa eroplanong misarasay sa ubos nga bahin.
Dugang pa nga gilayong nakaresponde ang security team sa maong plantasyon apan maayo na lang nga ang piloto nga si Fuentez naluwas sa hitabo apan nakahiagom og diyutay'ng mga garas sa lawas samtang ang abyon nadanyos sab. (Dexter T. Visitacion)