NAGBANGUTAN ang pamilya sa usa ka 26-anyos nga lalaki human nga aksidenteng napusilan sa iyang uyoan kinsa nadula og pusil alas 7 gabii niadtong Huwebes, Oktubre 14, 2021, didto sa Matalam, North Cotabato.
Nasayran nga ang pusil giingong gipanag-iyahan sa usa ka kandidato sa pagka-mayor sa Kabacan nga paryente sab sa suspek ug biktima.
Ang biktima mao si Aries Quezada, minyo ug nagpuyo sa Barangay New Bugasong sa nahisgutang lungsod.
Sa taho gikan sa kuwerpo sa kapulisan sa Kabacan Municipal Police Station, giingong gidula-dulaan sa uyoan nga si Rey Ignacio ang 9mm pistol, uban ang biktima.
Apan aksidente nga mibuto ang pusil ug naigo ang liog ni Quezada ug milapos sa likod nga bahin sa lawas.
Nadala pa sa balay tambalanan ang biktima apan pipila ka gutlo ang milabay nabugtoan gihapon siya sa kinabuhi.
Hinuon, misurender si Ignacio ngadto sa mga awtoridad ug giangkon niini nga aksidente lang ang pagkaigo patay sa iyang pag-umangkon.
Gibalhog si Ignacio sa selda sa Kabacan Municipal Police Station ug naghuwat sa posibleng ipasaka nga kaso sa pamilya sa biktima.