KAPULISAN sa siyudad sa Sugbo miandam na sa kaso nga ipasaka batok sa mga responsable sa pagpusil patay sa leader sa Alpha Kappa Rho (Akhro) nga si Richard Buscaino niadtong Biyernes, Oktubre 8, 2021.
Magtagbo sunod semana ang mga unit sa kapulisan nga naglangkob sa Special Investigation Task Group (SITG) nga maoy nakatutok sa imbestigasyon sa kamatayon ni Buscaino.
Matod ni Police Colonel Josefino Ligan, hepe sa kapulisan sa siyudad sa Sugbo, nga usa sa ilang tukion ang mga ebedensya nga nakuha sa mga imbestigador sama sa closed circuit television (CCTV) camera nga maoy hinungdan nga aduna na silay identity sa duha ka killers.
Dugang ni Ligan nga kon makabalik na ang pamilya ni Buscaino gikan sa kaulohan ug makompleto na ang mga dokumento, ila nang ipasaka ang kaso sa mga suspek.
“Probably after na mo arrive tong family from Manila nga moabot, makompleto na ang documents for the filing like the complaint affidavit and the witnesses affidavit para sa John Do’s nga atong sampahan,” matod ni Ligan.
Wala motug-an si Ligan kon kinsa ang mga tawo nga nalambigit sa pagpatay ni Buscaino.
Nagdumili pa usab siya sa pagbutyag kon unsay motibo sa krimen samtang gawasnon pa ang mga mamumuno.
Apan gihulagway ni Ligan nga mga kriminal ang mga mamumuno ug adunay records nga nakahimo na silag krimen sa Sugbo.
Nagpasalamat siya sa mga miyembro sa Akrho fraternity tungod sa saad niini nga motabang sa imbestigasyon dungan usab sa pasalig nga dili sila moluwat og pamahayag nga makapalubog sa imbestigasyon.
Niadtong Lunes gipakigkitaan niya ang mga chapter leader sa Akrho aron kuhaan sa ilang habig ug mga pagduda kon kinsa ang naghimo sa krimen.
Wala hinuon makakita og problema ang mga imbestigador sa Cebu City Police Office sa kabanay ni Buscaino tungod kay mi kooperar kini sa ilang imbestigasyon.
Si Buscaino giatangan sa riding in tandem sa may eskinsa mga Dan Tres de Abril ug A. Lopez, Barangay Calamba, Dakbayan sa Sugbo.
Nasuta pinaagi sa kuha sa CCTV nga mga 10 minutos sa wa pa moagi si Buscaino sa dapit, ang mga killer naghuwat na kaniya.