Vendors nag-rally pabor sa modernisasyon sa Carbon

TENSYON: Nagtinubagay kining duha ka mga babayeng vendor sa Carbon public market dihang nag-rally ang mga manindahay nga pabor sa modernisayon sa merkado sa Biyernes, Oktubre 15, 2021. / Amper Campaña
TENSYON: Nagtinubagay kining duha ka mga babayeng vendor sa Carbon public market dihang nag-rally ang mga manindahay nga pabor sa modernisayon sa merkado sa Biyernes, Oktubre 15, 2021. / Amper Campaña

KAPIN sa 100 ka mga manindahay nipakita sa ilang suporta sa pagpadayon sa Carbon market modernization sa dalan ML Quezon Boulevard, Cebu City pinaagi sa usa ka rally sa Biyernes, Oktubre 15, 2021, diin tukoron sa dapit ang 544 ka stalls sa mga ambulant vendor.

Si Zosimo Potot, presidente sa Landing Vendors Organization (Lavo) Seaside, maoy nangulo sa rally kansang mga sakop temporaryong nihunong sa pagpaninda aron ipaabot ang ilang pagpabor sa modernisasyon.

Si Potot nagkanayon nga bakak ang gipasiatab nga supak ang mga ambulant vendor sa Lavo seaside sanglit iyang gihulagway nga unom ra kabuok gikan sa 183 ka mga sakop ang nipadayag sa ilang pagsupak kun 97 porsyento ang pabor sa modernisasyon sa ilang organisasyon.

“Dili tinuod nga daghan ang nisupak sa kalambuan. Unom ra ka member ang nisupak.Among gipakita diha kaninyo ang tinuod nga tingog, ang tinuod nga kausaban nga atong natagamtaman gikan sa atong City Government,” padayag ni Potot.

Ang rally sa pro-Carbon modernization natumong nga gikan nibunok ang ulan ug gipakita ni Potot ang di maayong kahimtang sa ubang block sa manindahay diin nagbiaw ang tubig ug lapok samtang ang block 1 nga maoy nagsilbing model unit, wala makasinati niini.

“Lipay kaayo mi kay na elevate ang flooring, nalipay kaayo mi aning proyektoha nga gihatag sa Lavo seaside,” nagkanayon si Potot.

“Halin kaayo ang ilang tinda kay ang mga kustomer ganahan didto kay walay lapok ug hapsay nasad ang stall,”dugang sa presidente sa Lavo seaside.

Matod ni Potot nga dili demolition ang nahitabo, inay renovation sanglit human maguba ang ilang karaang stalls nga light materials, ilisan kini sa bag-ong stalls nga ginama sa mga puthaw.(PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph