ANG Cebu City Government dili supak sa clinical trial sa usa ka bakuna nga gama sa Westvac sa China apan kinahanglan nga pahibaw-on sa nagpasiugda ang local government unit (LGU).
Kini ang gipadayag ni Dr. Jeffrey Ibones, pangulo sa Cebu City Health Department, sanglit padayon nga sila blanko sa gihulagway ni Konsehal Dave Tumulak nga hilom nga pagbakuna sa mga residente sa dakbayan para sa clinical trial sa usa ka pribadong ospital.
“Ang importante nga ma-coordinate lang gyud sa City, akong balikon we are not against the clinical trial kay importante man gyud na siya kay kining atong mga vaccines niagi man gyud ni og trial. Ang importante lang, we coordinate each other lang gyud,” padayag ni Ibones.
Matod sa pangulo sa CCHD nga dili maapil sa mga pribilihiyo sa City Government ang mga nagpabakuna sa clinical trial.
Di na usab sila mahimong makapabakuna sa mga regular vaccines batok sa Covid-19.
Gipasabot ni Ibones nga nakig-alayon na ang CCHD ngadto sa pribadong tambalanan diin giingong gipahigayon ang pag-screen ug pagbakuna sa WestVac Biofarma. (PAC)