Editoryal: Diskarte sa mga trapo

Editorial art by Ariel Itumay
Editorial art by Ariel Itumay

WA pay election period alang sa piniliay sa Mayo 2022. Apan sama sa naandan, ang mga tradisyonal nga politiko o trapo ningpahimulos sa paghimo sa ilang matang sa pamulitika nga dili pa makuwestiyon sa Commission on Elections (Comelec) bahin sa ilang gasto ug ang way limit nga campaign materials.

Ang mga trapo way pugongpugong sa pagsaad nga makabuhi og patay, sama sa heneral nga pagsulti sa paghaw-as sa masa gikan sa kalisdahan, trabaho sa tanan, seguridad sa pagkaon ug desenteng balay, pagpabangon sa ekonomiya, libreng serbisyo, panglawas ug daghan pang uban.

Ang maong mga isyu nanggawas na sa baba gikan sa mga trapong politiko sukad niadto.

Kinaiya sa trapo nga mougkat sa mga personal nga baho ug ibutyag sa publiko. Sayop nga akusasyon o bugalbugal sa lainlaing plata-porma sa social media. Kon kini ang maghari ning sayo pa, klaro nga magbaha na usab ang kuwarta sa pagpamalit og boto.

Hinuon, maayong nanggawas kini nga mga kinaiya nga sayo pa. Makapalandong pag-ayo ang haring-lungsod, kon kini nakamata na usab sa kamatuoran, kon kinsa ang angay hatagan sa balaang boto.

Subli natong pahinumdoman ang masa nga igmat. Dili magpagamit sa hinakog nga interes sa mga trapo nga nagtakoban nga maayo ning panahona.

Sa eleksiyon, batakang proseso sa demokrasya, seguradong dunggon ang masa. Samtang, higayon kini nga makapili sa maayong mosunod nga motimon sa kagamhanan. Kon dili kita aktibong magpakabana, kita usab ang mag-antos sud sa termino sa mga mapiling opisyal.

Ug sa opisyal nga pagsugod sa kampanya sa sunod tuig, gipaabot nga mas mobukal pa ang kawa sa pulitika sa mga diskarte sa matag politiko ug partido nga buot moabante sa lumba. Dili kita magpadala sa diskarte. Maniid aron makapili kita pag-ayo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph