UYOAN gidunggab patay sa iyang pag-umangkon nga iyang gisukmag kay wa mosangpit kaniya og “Tiyo” ala 1:10 sa kaadlawon sa Huwebes, Oktubre 14, 2021 sa Purok Tangkong, Brgy. Baring, Lungsod sa Carmen, amihanang Sugbo.
Si Arcadio Caputi Guiroy, Jr., 31, ulitawo, trisikad driver, nagpuyo sa lugar, patay nang niabot sa tambalanan sa dakbayan sa Danao tungod sa samad dinunggaban sa dughan, tiyan, kilid ug buko-buko.
Ang suspek nga si Ryan Guiroy Basister, 24, ulitawo, traysikad driver, ni-surrender pagkabuntag sa Huwebes sa kapulisan sa Dakbayan sa Danao.
Si Police Staff Sgt. Ever Villacarlos sa Carmen Police Station nga nahinabi sa Superbalita Cebu nagkanayon nga nagtagay sila si Guiroy ug Basister ug mga barkada.
Nagkalalis sila si Guiroy ug Basister dihang nangahubog kay wa motahod ang suspek sa biktima.
Si Basister nga nahinabi sa Superbalita Cebu nagkanayon nga nahimo niya ang kremin human siya gisumbag sa iyang uyoan.
“Nasuko siya nako kay ngano dili kuno motahod niya, mag “Junior” lang. Ako tawag dili tiyo. Ako giingnan nga naandan naman nako sukad pagkabata,” dugang ni Basister.
“Unya nasuko man siya, iyaha kong giingnan nga mosukol gyud diay ka nako?” asoy ni Basister.
Dayon gisumbag siya ni Guiroy sa dughan ug apapangig hinungdan sa iyang pagkabulintang.
Tungod sa kalagot, dihang iyang nakuptan ang kutsilyo nga para tunga sa ice, iyang gidungab si Guiroy.
Dugang ni Basister nga mitahod siya sa iyang uyoan, apan kon mahubog magsige og panghudlat kaniya. Matod ni Basister dugay nang magsige og patahod, gusto niini nga tahuron sa tanang mga higayon.