Daghang nakuryuso niining negatibong performance sa Los Angeles Lakers sa bag-o lang natapos nga preseason games sa NBA.
Tiaw mo bay walay gidag-an sulod sa unom ka duwa. Kini bisan pa man og nanuwa na ang ilang Big Three nga sila si LeBron James, Anthony Davis ug Russell Westbrook.
Hinuon kining preseason games mora ra ni siya og exhibition matches sa dili pa sugdan ang regular season.
Alang sa uban, kini maoy ilang gihimong experimental games aron makakita sila sa epektibong kombinasyon ug ingon man ang pagsinatiay sa ilang mga batos ilabi na kadtong mga bag-o nilang recruit.
Ang 116-112 nilang kapildihan sa mga kamot sa Sacramento Kings niadtong Huwebes maoy nagtuldok sa ilang hamubong kampanya.
Tungod niini, nigimaw na karon og balik ang mga pangagpas kaniadto nga dili gyud diay epektibo ang paghiabot ni Westbrook sa Lakers.
Dili siya haom o kaha naghatag lang siya og komplikado nga position ni James ilabi na kay susama man sila og estelo nga hilig og darok-darok.
Pero batok sa Kings nga maoy ikaunom nilang kapildihan, aduna usay anino sa kalambuan sa Lakers nga nagpahipi sa maong panag-engkuwentro.
Dinhi nakapakita si James sa iyang pinakamaayong duwa nga gani sa unang 18 minutos sulod sa korte, nitali na siya og 19 puntos. Gipapahuway siya og kadiyot (tungod sa gamayng injury) sa tikod, pero sa paghibalik niya padayong nagmahaiton ang iyang opensa diin sa kinatibuk-an, nakakolekta siya og 30 puntos, unom ka rebounds ug unom ka assists.
Sa susamang kalambuan, mao usab kini ang pinakamaayog napakita ni Westbrook sa preseason.
Sa opensa, aktibo kining motadlas-tadlas sa shaded area isip usa ka cutter ug maayong mangitag lugar nga mabakante aron makaitsa o makakita og saktong kapasahan.
Mao ni usa sa sistema nga iyang sagupon aron maepektibo ang iyang presensiya sa Lakers. Iyang dawaton ang bag-ong papel nga backup ra gyud siya ni James ug way luna nga makigkoMpetensiya siya sa pinuntosay niini.
Ipakita niya nga andam siyang motapak sa haw-ang sa Los Angeles.
Ang kanhi pambato sa Wizards nitali og 18 puntos ug dunay lima ka assists sulod sa 29 minutos.
Wa makaduwa si Talen Horton-Tucker ug si Trevor Ariza sa preseason tungod sa injury ug siyam ra ka mga players ang perming gigamit sa Lakers nianang gabhiona.
Mao nga bisan gani si Carmelo Anthony, ang laing lig-ong puwersa sa opensa sa Lakers, wala mabalaka niini kay siya mismo sayod nga sa tukmang higayon, magka jell ra gihapon sila.
Si Carmelo Anthony midunol og 15 puntos, samtang 14 ang natampo ni Anthony Davis kinsa milangkat og 12 ka rebounds.
Laing 12 puntos gikan ni Deandre Jordan nga may pakapin nga 11 ka rebounds.
Kon imong analisahon, dili problema ang opensa kay nakita nato nga double figures man ang ilang mga starters.
Pero kon di gani sila mopalig-on sa ilang depensa, aw tingali og kining bati nilang performance sa preseason mao sab unya ang mahitabo sa regular season. (jun.migallen22@gmail.com)