Sayod si Jonas Sultan kon unsa ang kalidad ni Carlos Caraballo kinsa wa pay pildi sa 14 ka mga away diin pulos gipang-knockout ang iyang mga kontra.
Apan sa dihang iyang nakita sa recorded video ang inawayan niini, kombinsido si Sultan nga ang Puerto Rican prospect dunay kapildihan ug dili usab kini kusog og kumo sama sa gituohan.
Dako ang pagtuo ni Sultan nga mas kusog pa siya og kumo kay ni Caraballo sa dihang iya kining ikabagat karong Oktubre 30 sa Madison Square Garden sa New York City.
"Siguro modagan ni kon maigo sa akong kinumo," matod sa lumad nga taga Tampilisan, Zamboanga del Norte sa usa ka interview.
Tinuod nga daghan man tuod og knockouts si Caraballo apan alang kang Sultan nga pulos mga milhay ang nakontra niini.
Gibutyag ni Sultan nga hugot na kaayo ang iyang ensayo karon nga modagan na og duha ka semana sa Wild Card Boxing Club sa Hollywood ubos sa pagdumala ni Joven Jimenez, ang chief trainer ni International Boxing Federation (IBF) super flyweight champion Jerwin Ancajas.
Si Sultan, (17-5, 11KOs) gisaaran sa iyang promoter nga si Brendan Gibbons kon impresibo kining modaog batok ni Caraballo.
Matod niya nga ang laing kahigayonan nga makaaway alang sa world title fight maoy anaa sa ilang plano karon.
Si Ancajas, kinsa maoy nagpildi kaniya sa ilang world title fight niadtong 2018, ang nitabang karon ni Sultan ug nagsilbing sparring partner.
Gawas kang Jimenez, hugot usab nga miitsa sa ilang suporta ngadto ni Sultan sila si Junnie Navarro ug Mike Venezuela sa Zamboanga Valientes. (JBM)