Ang beterano ug kanhi PBA player nga si Patrick Jan Cabahug uban sa batan-on ug most valuable player awardee sa Cebu Schools Athletic Foundation, Inc. (Cesafi) nga si Shaquiel Imperial maoy mangulo sa pipila ka mga Sugboanon nga molangkob sa Manila-based team alang sa Filbasket, ang bag-ong basketball league sa nasod.
Ang Medical Depot nga gipanag-iya ni JR Medina ug Mike Aldover maoy usa sa 11 ka mga teams nga giingong mosalmot sa inaugural season sa maong liga nga gikatakdang sugdan sunod buwan.
Ang Filbasket nga ipaubos sa bubble setup nga torneyo adto ipahigayon sa Splendido, Laurel, Batangas nga molanat og kapin usa ka buwan.
Kini abli alang sa mga commercial, corporate ug regional teams ug andam usab nga mo-host og mga duwa sa international Filipino clubs.
"Apil mi sa Filbasket. Unya halos tanan puro mi mga Cebuano player," matod ni Cabahug kinsa aduna nay igong eksperyensiya sa mga international tournament.
Gipaluyohan sa Puma, Supercee ug Caster Pharama, mobida usab sa Medical Depot sila si Alwin Aguirre, Tristan Albina, Andre Armenion, Johnnel Ray Bauzon, Simon David Camacho, Robbi Marion Darang, Egie Boy Mojica, Christian Dave Moralde, Dawn Hyndric Ochea, Kevin Rey Villafranca ug Reeve Ugsang.
Ang team ubos sa paggiya ni coach Aldwin Morante. (JBM)