SECTIONS
Superbalita Cebu
Thursday, December 09, 2021
SUPERBALITA CEBU

Super Blowout: Mga mithi sa lalake iyang nakaplagan

Unsa ang mga hiyas nga imong gipangita sa tawo nga imong gusto nga makauban sa imong tibuok nga kinabuhi?

Alang ni Krizza Whedda Hortel-Medida, ang pagkasinsero, pagkamatinabangon, pagkamahigugmaon sa inahan ug pagka family-oriented sa iyang bana nga si Johnley Medida, ang mga hiyas nga iyang nakita hinungdan nga nakahukom siya nga kini maoy iyang ikauban sa kinabuhi.

"Mao na gyud ni ang tawo para sa akoa. Motabang siya nako nga mo-grow up, mo-survive sa life," matod ni Krizza.

Samtang, si Johnley nakita usab niya nga seryuso, mahigugmaon ug mapinanggaon si Krizzy.

Niadtong Septiyembre 16, 2021, gikasal ang duha sa Cebu Metropolitan Cathedral sa siyudad sa Sugbo.

Nagplano unta sila nga magpakasal niadtong Agusto 17, 2021, apan tungod kay nisaka ang mga kaso sa Covid-19 sa Sugbo niadtong higayona, ilang gisibog og laing petsa ang ilang pagpakasal. Espesyal ang numero 8 ug 16 sa magtiayon gumikan kay ang 8 ang petsa nga sila nagkauyab, Oktubre 8, 2017. Nangita unta sila og petsa nga mo-total og 8, apan kay puno ang eskedyul sa simbahan, Septiyembre 16 ang ilang gipili. Ang 16, espesyal hinuon nila kay kini ang petsa nga ni-propose si Johnley kang Krizza.

Ang duha pulos frontliners sa pandemiya nga giatubang karon. Pulos sila mga nurse.

Nagsugod ang ilang love story sa rural health unit (RHU) sa lungsod sa Boljoon niadtong 2017.

Si Krizza, 30, nurse nga gipada sa Department of Health samtang, nakadestino na daan sa RHU si Johnley, 32.

Asoy ni Krizza, naka-crush na niya si Johnley, ug kanunay siya tabangan niini sa iyang mga gimbuhaton sa RHU sa Boljoon sama sa pagpamakuna sa mga bata.

Nabalhin sa lungsod sa Oslob si Krizza samtang nagpabilin sa RHU sa Boljoon si Johnley.

Sa Cuartel, nabantog nga tourist site sa Oslob, ni-propose si Johnley kang Krizza.

"Na-shock ko unya nidagan palayo sa iyaha. Naglibog ko unsay akong buhaton. Pero nibalik ko unya niingon ko, "Oo, yes," saysay ni Krizza nga nahimuot ug gikilig samtang nihandom sa ilang kaagi sa proposal.

"Mag-ampo, magsinabtanay. Remember, si God naa ninyo...," tambag sa bag-ong magtiayon ngadto sa nagplano magpakasal.

Limitado lang sa 100 ka mga bisita ang ilang reception nga gipahigayon sa Bayfront Hotel Cebu.

Mapasalamaton ang magtiayon sa mga tawo nga nakatampo nga nahimong halandomon ang ilang kasal sama sa: Joshua Events, coordinator; Glenn Jubs Photography, photographer; Sugbo Films by Lloyd Brylle Mejares, videographer, ug Paul Flores, hair ug makeup. (SCG)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!