Sa bisan unsa nga buhat, kon imo na kining batasanon, bisan di ka maghuna-huna, imo kining mabuhat. Naandan na nimo. Sama sa pagmata og sayo ug pag exercise. Nahimo na nimo ni nga routine, makamata ka sa oras nga maoy imong naandan. Mangita na ang imong lawas sa pasingot.
Mao usab ni kon mag drive ka og sakyanan, duha o upat man ang mga ligid. Sama sa pagpasiga sa imong signal light, left o right turn. Kon kanunay na nimo ning buhaton, kada liko nimo, automatic na kini. Di ka na maghuna huna nga imo pa ning buhaton o makalimtan lang. Kay naandan na man gud nimo ni nga gibuhat, sama na og reflex ang pagbuhat.
Unta, tanang drivers sa karsada magbuhat ani. Apan pastilan, kadaghan sa buluyagon sa karsada nga bisan sa pag signal lang sa pagliko sa sakyanan nga gimaneho wa buhata. Unya mao baya ni ang usa sa mga hinungdan sa mga disgrasya sa karsada. Ako bitaw, kapila na man ko hapit madusmo dihang nagbiseklita ko ug nagmotorsiklo kay ang sakyanan nga akong gisundan wa mosinyas, moliko o molugar ba sa daplin nga kalit ra kaayo.
Mahitabo ang disgrasya tungod lang sa simple kaayong buhat, kanang wa paggamit sa simple kaayong safety device nga gibutang sa sakyanan—ang signal light. Bisan unsa ka moderno sa sakyanan, di mawala ang signal lights.
KONSULTA
Kon duna ka nay edad, labina sa 40s, mas maayong mokunsulta ka og doktor sa di ka pa mag ehersisyo. I mean kon sama ka nako nga kon wa mag 40, una pa nag mountain biking. Nangutana ko og doktor kon okay ra ba nga mag exercise ko. Ni go signal ang doktor kay base sa akong medical record, okay ra.
Nikonsulta ba kaha intawon tong 60 anyos nga nag bike nga giatake samtang nagtadlas sa national highway sa Lawaan, Dakbayan sa Talisay niadtong Huwebes sa hapon. Namatay siya human nga kalit lang nahagba. Matod sa akong higalang si Joy Tumulak, traffic zcar sa Talisay, hayan giatake sa kasingkasing.
Maayo usab nga paminawon ang lawas sa di pa mosikad o bisan unsa nga klase sa exercise. Sayon ra kaayo tan-awon ang biseklita, apan kon molapas ka na sa tulo ka kilometro, diha ka na makaamgo nga di diay ni kapangandakan. Kinahanglan nga anam-anamon nimo og paanad ang lawas sa pagsikad.
DI KALIT
Sa bisan unsa nga exercise, kinahanglan nga di diretso. Kon magbiseklita lagi, ayaw ahata ang lawas. Kuyaw kaayo nga makalitan ang imong mga muscle nga source sa imong kusog. Bisan gani ang sakyanan dunay gitawag og breaking in sa makina, unsa na kaha ang lawas?
Nagkinahanglan niinin ang lawas. Ayaw diretso og pabug-at, tungas og taas ug biyahe og layo. Anara una ang lawas aron di madisgrasya. Nagkinahanglan kini og period of adjustment.
Mag-amping kita sa pag-ehersisyo labina kon edaran ka na. Pamation og maayo ang lawas. Di ahaton kon sa imong paminaw di ka kondisyon sa pagbuhat. Gikinahanglan nga anaron ang lawas. Hinayhinay basta kanunay.