SECTIONS
Superbalita Cebu
Thursday, December 09, 2021
SUPERBALITA CEBU

Mongaya: Health protocol diay?

Panahom

Kinahanglan ba diay mag-social distancing ang mga sakyanan kon mag-motorcade? Mao kini ang nisantop sa akong hunahuna dihang gitugtan ang mga supporters ni Vice President Leni Robredo nga magpahigayon og motorcade kagahapon sa hapon.

Nangayo man gud kining nag-organisa og permiso sa maong kalihokan ug tuod man gitugtan sa Emergency Operations Center (EOC) sa Syudad sa Sugbo. Apan kutob lang daw sa 20 ka sakyanan.

Ah. Busa nisantop sa akong hunahuna nga mag-sosyal distancing sab diay ang mga nag-sakyanan. Angayang 20 lang kay basin maghuot.

Aw, basin trapik diay no? Pero ang CCTO unta ang moalma.

Nangangha ko kay kining mga opisyal sa Syudad sa Sugbo mao ra bay numero uno nga dili motuman sa ila mismong mga lagda nga health protocols.

Hinuon, basin wala lang silay pagtahod sa acting mayor nga si Mike Rama nga maoy naglagda sa mando nga magpuyo ug dili mag-social gathering.

Acting Mayor Mike, gawas sa pagpangayog pasaylo, siloti sab nang imong mga sakop sa partido nga magpapili oi.

Ipadakop sab sila sa kapulisan ug mag-push up sa plaza o sa SRP.

Maayo gani kay ang akong suod nga higala nga si Kons. Joel Garganera wa intawon maapil sa mga mingsupak.

Face Shield

Nisulod ko og usa ka supermarket dinhi sa Syudad sa Sugbo nga gabitbit lang sa akong face shield.

Gisugat ko sa sikyo ug giingnan nga isul-ob ang face shield. Kay imbes nawong, ang ulo man ang gitabunan sa akong nakit-an sa sulod, nangutana ko kon mahimo bang ipandong lang nako pareho sa mga nag-una sa sulod nako.

Aw nitando sab nga nagngisi ang sikyo. Kay mando daw.

Nibalik sa pagsantop sa akong hunahuna nga dinhi lang baya sa Pilipinas kining gimando gyud nga tanan mag-face shield.

Tungod ba kaha kini kay dakong negusyo sa mga dagko natong opisyal ang gi-supply sa Pharmally?

Nangutana lang ko hap. Daghan ra ba kaayo ang allergic nga sawayon ang ilang bastos nga presidente.

Pacquiao

Daghan ang nadismaya nganong wa maapil si Neri Colmenares, ang kandidato sa Makabayan alang sa pagka senador, sa listahan ni Leni ug Kiko Pangilinan alang sa ilang senatorial slate.

Ayaw lang sab mo kalain dayon ba. Naa pa may kulang usa ka ngalan ang ilang listahan.

Bisan pa man, naay nangutana kon nganong naapil si Migz Zubiri. Oposisyon ba diay siya? Di ba majority floorleader sa Senado karon? Di ba kabang?

Kabang

Di man lang ang sa mga national slate ang kabang karon.

Sugdan lang natog hisgot ang politika sa Syudad sa Sugbo. Pananglitan, naila si kanhi mayor Tomas Osmeña nga suod ni Leni. Pero nakabisita kaniya si Sen. Pacquiao ug ang kandidato alang sa pagka bise mayor sa BOPK nga si Franklyn Ong supporter ni Pacman.

Apan, ang ilang kandidato alang sa pagka kongresista sa north district nga si Cutie del Mar giingong supporter ni Inday Sara.

Sa pikas bahin, si acting mayor Mike Rama giingong supporter ni Inday Sara. Apan ang iyang kandidato alang sa pagka kongresista sa north district nga si Niña Mabatid suod ni Pacquiao. Mopadayon pa kog aninaw sa politika sa Sugbo karon hap. (DM nako sa @anol_cebu)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!