Gibana-bana nga moabot sa P1.5 milyones nga cash ang nadala sa tulisan nga nipusil patay sa negosyante sa Biyernes sa gabii, Oktubre 15, sa Barangay Pusok, Lapu-Lapu City.
Base sa spot report sa Police Station 5 (Pusok) sa Lapu-Lapu City Police Office giila ang biktima nga si Deen Vincent Agan Jumawan, 48, car rental coordinator, taga-Fabro Hills Subdivision, Barangay Pusok.
Sigun sa paghulagway sa nakakita nga ang gunman nga padayon pang gi-ila nagsul-ob og kolor green nga hooded jacket ug face mask.
Sa wala pa ang hitabo, si Jumawan uban ni Mark Kintanar Queblatin, kinsa supplier sa car for rent, kuyog niadtong higayona.
Gikan pa sa ilang balay si Jumawan aron pagkuha og dakong kantidad sa kuwarta nga maoy ibayad ngadto sa ilang suppliers.
Sa pag-abot sa Amani Grand building sa Sityo Cemento, Pusok diin nahimutang ang buhatan ni Jumawan, ang tulisan namatikdan nga nagsunod sa pagsaka sa maong building.
Samtang naglakaw sila si Jumawan ug Queblatin sa hallway sa ikatulong andana sa edipisyo, namusil ang tulisan gamit ang .45 kalibre nga armas, punting ngadto ni Jumawan samtang nagpadayon sa iyang paglakaw bitbit ang plastic bag nga maoy gisudlan sa kuwarta.
Pagkahagba ni Jumawan dali nga gilabnot sa tulisan ang plastic bag dayon biya sa lugar.
Giingong usa ka gwardya sa laing establisemento nakakita sa tulisan nga daling nikanaug sa building ug nisakay sa motorsiklong naghuwat.
Nisibat ang tulisan ug kauban padulong sa Marcelo Fernan bridge.
Nahipos sa kapulisan ang lima ka basiyo sa bala ug duha ka deformed fired bullets.
Si Jumawan namatay sa iyang samad sa dughan.
Nagpadayon ang imbestigasyon sa maong pagpanulis ug gihangyo sa kapulisan ang management sa edipisyo nga mangayo og kopya sa CCTV footage ug sa mga duol mga establisemento nga makagiya sa imbestigasyon sa mga awtoridad. (dugang taho ni Alan Tangcawan)