Sirado ang tanang mga pribado ug pampublikong sementeryo sa dakbayan sa Mandaue karong Kalag-kalag, sugod sa Oktubre 31 ngadto sa Nobiyembre 2, 2021.
Nipagawas si Mandaue City Mayor Jonas Cortes sa iyang executive order (EO) sa mga sumbanan nga ipatuman karon Kalag-Kalag, usa niini ang pagsirado sa tanang mga sam-ang.
Mipahinumdom sab si Cortes nga ang kabanay sa mga mitaliwan na mamahimong mobisita sa sementeryo sa dili pa ang temporaryong pagsira o human ang pagsira.
Bisan pa man, kon adunay tambungan nga lubong ang mga kabanay, mamahimong makasulod sa sementeryo ug kinahanglan nga motuman sa minimum health protocol.
Sa dili pa ang pagsira o human ang pagsira, 50 porsyento lang sa kapasidad sa venue sa sementeryo ang pasudlan.
Kinahanglan nga motuman sa mga minimum health protocol.
Ipatuman gihapon ang curfew nga alas 10 sa gabii hangtod sa alas 4 sa kaadlawon sa sunod adlaw.
Tanang pampublikong mga sementeryo mamahimong mag-abli kutob sa alas 8 sa gabii samtang ang mga pribadong sementeryo makapatuman gihapon sa ilang kaugalingong sumbanan apan kinahanglan nga motuman gihapon sa curfew.
Gidili sab ang pagkaon sulod sa mga sementeryo ug pagbaligya og kandila ug mga buwak.
Gitahasan ang Mandaue City Police (MCPO) ug ang mga tanod nga mag foot traffic sa mga sementeryo aron ipatuman ang maong mandato. (KFD)