DRUG den nga nahimutang sa sitio Lower Nawanao, Barangay Subangdako, Siyudad sa Mandaue gironda sa mga ahente sa Philippine Drug Enforcement Agency (PDEA) 7 alas 9:30 sa Biyernes sa gabii, Oktubre 15, 2021.
Sa anti drug operation, ilang nasikop ang lima ka mga tawo, apil na ang drug den maintainer nga si Ivy Villarin Novela, 32, vendor, nabutang sa target list, ug ang iyang sinaligan nga si Jan Mark Velasquez, 35.
Lakip sa napusasan mao silang Jhay-ar Caisia, 32; Braindyl Gonzaga, 37; ug Arnold Cabrera, 19.
Nasakmit sa mga operatiba ang 14 ka mga pakete sa gidudahang shabu nga motimbang og 60 gramos nga adunay estimated value nga P408,0000, buy-bust money ug gamit sa pagsuyop.
Matod ni Leia Alcantara, information officer sa PDEA7, nga moabot sa usa ka semana ang ilang gihimong case build up.
Ilang nasuta nga maka baligya si Novela og 100 gramos mataga semana.
Ang pagbungkag sa mga drug den usa sa mga nag-unang tumong karon sa PDEA 7. (AYB)