Gibutyag ni NLEX Road Warriors coach Yeng Guiao nga wala siya nasurpresa nga maayo ang gipakitang duwa sa iyang kanhi sinaligang pointguard nga si Kiefer Ravena sa kampanya niini sa Japan B.League.
Si Ravena, kinsa gitugtan sa NLEX ug sa Philippine Basketball Association (PBA) nga makaduwa sa Japab B.League ubos sa kampo sa Shiga Lakestars, wala’y giusik nga panahon sa pagpakita sa iyang ikabuga ngadto sa Japanese basketball fans.
Sa nag-unang lima ka mga duwa sa Lakestars, si Ravena nag-average og 27.5 minutos nga playing time diin mitali siya og 12.2 puntos, 5.4 assists, 2.0 rebounds, ug 2.0 steals matag duwa.
“Kiefer has been playing consistently for us before he left. He was in excellent shape, ang ganda ng kundisyon niya noong bago siya umalis,” matod ni Guiao sa interbyu sa Power Point nga napatik sa www.abs-cbnnews.com.
Sa wala pa siya mibiya paingon sa Japan, si Ravena nag-average og 15.8 puntos ug league-leading 6.5 assists alang sa Road Warriors sa 2021 PBA Philippine Cup. Mirehistro sab siya og 42.3% sa three-point area.
“Alam naman natin si Kiefer is an experienced baller internationally,” pasabot ni Guiao.
“Kasama ko siya sa World Cup, kasama namin siya one year before that, training kami ng Spain, ng Europe, iba-ibang windows ng World Cup. So, he did not surprise me that he would do well in Japan.”
Nidugang si Guiao nga gumikan sa talento ni Ravena, dali ra kining maka-adjust bisan asa kini moduwa.
Tungod sa maayong gipakita ni Ravena sa B.League, giangkon ni Guiao nga nabalaka siyang dugay pa kining makabalik alang sa NLEX.
Ang NLEX ug PBA ningtugot kang Ravena nga makaduwa sa B.League og usa lang ka season unya mobalik na kini sa nasod inig human niini.
Ang kasamtangang season sa B.League mahuman karong Mayo, 2022. (ESL)