Naangkon sa Talk N’ Text (TNT) Tropang Giga ang ikaduhang lingkuranan sa finals human nila gipangmakmak ang San Miguel Beermen, 97-79, sa ilang deciding Game 7 semi-finals series sa Philippine Basketball Association (PBA) 2021 Philippine Cup kagahapon, Oktubre 17, 2021, sa Bacolor, Pampanga.
Sa kadaugan, nakuha sa Tropang Giga ang katungod sa pagpakigbatok sa Magnolia Ang Pambansang Manok Hotshots alang sa best-of-seven championship series.
Ang Hotshots maoy unang nakasulod sa finals human nila gipalagpot ang Meralco Bolts, 4-2, sa ilang kaugalingong semi-finals series niadtong Oktubre 15, 2021.
Ang kadaugan sa Tropang Giga gipangulohan ni Roger Pogoy pinaagi sa iyang 27 puntos, nidugang og 20 puntos si rookie Mikey Williams, nihatag og 12 puntos si Troy Rosario samtang nihatag og 11 puntos ang beteranong si Kelly Williams.
Ang Beermen gipangulohan sa higanteng Sugboanon nga si JuneMar Fajardo pinaagi sa iyang 22 puntos samtang nidugang og 15 puntos si Chris Ross. (ESL)