Dear Papa Joe,
Tawaga lang ko sa pangan nga Jimmy, 30 years old ug may ka live in ug usa ka anak. Sila naa karon sa Negros samtang ako ania sa Cebu nanimpalad sukad naundang ko sa trabaho tungod sa pandemic.
Samtang naa ko diri, naay sige og pangdaut nako nga naa daw koy babaye diri nga gikabuangan ug nituo sad dayon akong pares. Iyang gi-post sa Facebook ug ipapriso daw ko niya. Mao nga nitubag sad ko sa Facebook ug nidako among away.
Karon di na siya motubag nako ug di nako kaestorya sa among anak. Unsa may buhaton nako? Tambagi ko.
JIMMY
Jimmy,
Maayong adlaw nimo. Siguro ang mahimo nimo mao ang pag-uli didto sa Negros para maestoryahan na ninyo. Naa gyuy paagi kon gusto ka nga mouli didto.
Lisud na sa Facebook mo magbinirahay kay pistahan mo sa mga tawo, labi na sa tawo nga gusto nga mabuwag mo. Basin para sa imong pares nga ang ubang tawo naninguha mouli ikaw wa ra, labi na wa kay trabaho ug makahunahuna siya giunsa nimo pagpakabuhi diri sa Cebu.
Way daghang istorya uli sa inyoha.
PAPA JOE
(sa inyong tampo ipadala lang sa papajoesuperb@gmail.com)