Miabot sa 23.18 ka milyon ka mga tawo sa Pilipinas ang kompleto na sa bakuna batok sa Covid-19 hangtod sa Oktubre 10. Kini 30 porsyento sa target adult population. Ang pagbakuna sa Pilipinas nagsugod niadtong Marso 1, 2021.
Apan matod pa ni Presidente Rodrigo Duterte, daghan gihapon ang nagdiki-diki sa pagpabakuna. Duna siyay solusyon nga nahunahunaan. Unsa man?
Sak-on sila sa ilang balay sa panahon sa kagabhion samtang natulog ug bakunahan.
* * *
Matod pa ni Presidente Duterte, ang pagpabakuna da maoy makawagtang sa labad sa ulo sa atong nasod. Kadtong di gustong magpabakuna, maoy babag sa pagkab-ot sa herd immunity.
Ang dakong pangutana mao nga si kinsa man sab kaha ang mosaka sa kabalayan niadtong supak sa bakuna samtang sila nangatulog aron mobakuna kanila.
Di sab kaha ni sila magsigig inom og kape aron di makatulog?
* * *
Hangtod sa Oktubre 10, ang Pilipinas nakadawat og 86,494,050 ka doses sa Covid-19 vaccines, ang 22,561,180 ka doses niini gidonar pinaagi sa Covax Facility.
Ang Covax, minugbo sa Covid-19 Vaccines Global Access, gipasiugdahan sa Gavi, Vaccine Alliance, Coalition for Epidemic Preparedness Innovations ug sa World Health Organization alang sa patas ug angay nga pag-apud-apod sa Covid-19 vaccines.
Pinaagi sa Covax, ang mga kabus nga nasod mapiskan gihapon sa mga bakuna. Apan ang mga dato nga nasod mao gihapon ang mag-una sa bakuna kay duna may ikapalit.
* * *
Sugdan na ang pagbakuna sa tanang mga hingkod og edad sa Pilipinas kay daghan na ang mga bakuna nga miabot. Sugdan na sab ang pagbakuna sa kabataan nga nag-edad og 12 ngadto sa 17 anyos.
Giawhag ni Visayas Vaccination Operations Center (VVOC) spokesperson Mary Jean Loreche ang mga eligible sa bakuna nga magpabakuna na aron merry ang atong Christmas ning tuiga.
Ayaw paghuwat nga makatulog mo. Kay kon si Presidente Duterte ang pabut-on, kon makatulog mo, bakunahan mo.