Ang Department of Social Welfare and Development (DSWD) Region 7 nidawat sa donasyon gikan sa Bureau of Customs (BOC) niadtong Oktubre 6, 2021.
Si Regional Director Rebecca P. Geamala maoy nidawat sa donasyon uban ni Assistant Regional Director for Administration Antonio R. Dolaota, Disaster Response Management Division Chief Lilibeth A. Cabiara, ug Sustainable Livelihood Program Regional Coordinator Rizalina L. Patindol.
Si Director Geamala nipirma sa deed of donation sa Septiyembre 1, 2021 sa DSWD Field Office VII uban sa presensiya sa Port of Cebu Chief of Law Division Atty. Vicente Andrew Espina ug Auction and Cargo Disposal Unit (ACDU) Chief Engr. Ronald Morillo, kinsa representante sa Bureau of Customs (BOC) Cebu Collector Atty. Charlito Martin R. Mendoza.
Si BOC Commissioner Rey Leonardo B. Guerrero nimando sa dinaliang pagdonar sa mga abandonado nga kargamento sa 4x 20-footer vans nga dunay sud nga twine yarn, droppings, ug cuttings nga nalakip sa Bill of Lading No. SITGDRCB006636 to DSWD-7.
Ang maong kargamento niabot sa Port of Cebu sa Oktubre 5, 2019 ug nagpabilin nga wala kuhaa human sa kapin sa tuig bisan sa notisya sa BOC sa consignee ug ubang interesado nga partido nga gustong mokuha sa kargamento.
Ang BOC nideklarar nga abandonado ang maong kargamento niadtong Enero 8, 2020.
Isip mandato sa Republic Act No. 10863 o ‘Customs Modernization and Tariff Act,’ ang tanang unclaimed goods sud sa gitakda nga panahon, mahimong ipaubos sa paghipos ug mahimo idonar sa ubang ahensiya sa kagamhanan.
Ang DSWD, ahensiya nga nagtutok sa pagpalambo sa social protection ug poverty reduction solutions, mahimong mogamit sa maong mga panapton sa pagsuporta sa ilang Sustainable Livelihood Program Associations (SLPAs) nga dunay rag-making ug ubang matang sa panginabuhian.
Ang DSWD-7 nagsugod sa pagpang-apud-apod sa mga panapton sa SLPA sa mga lungsod sa Aloguinsan, Consolacion, Barili, Toledo City ug Cebu City. / PR