Dalaygon ang konsepto sa contact tracing. Napamatud-an nga epektibo sa pagkontrolar sa pagtakboy sa mga mananakod nga sakit sama sa mangtas nga matang sa virus, ang coronavirus disease 2019 (Covid-19) nga naghulga dili lang sa Sugbo, apan sa tibuok kalibotan.
Gawas sa bakuna, nakatabang sa ubang nasod nga hingpit nang nakaplastada sa bag-ong normal tungod sa maayong sistema sa contact tracing, ang daling pagsuta sa mga tawo nga nakahalubilo o naduol sa usa o mga tawong nga positibo sa Covid-19 human gipaubos sa test o ang sagad nga swab test.
Usa kini sa mga pamaagi nga gisagop sa Pilipinas, maobserbahan nato kini nga aktibo sa Sugbo, alang sa pagsanta sa Covid-19 nga karon nagpakita na og laing variants sama sa Delta nga mas mangtas sa ubang genome o henerasyon sa virus, sumala sa Department of Health (DOH). Mas risgo kon dili pa makontrolar.
Nakasuway ka na nga maapil sa contact tracing? Purbida, may sekolohikal nga epektiho bisan magnegatibo tungod sa walay maayong sistema sa lokal ang contract tracing. Sumala pa (dili opisyal nga kasayoran, base sa tabitabi), ang magpositibo sa contact tracing i-extract o kuhaon dayon aron ibutang sa isolation facility sud sa dili mominos 72-oras gikan sa test.
Kon negatibo, good luck, magsige ka og hunahuna kon unsay resulta sa imong test. Walay opisyal nga pahibalo base sa kasinatian sa kadaghanan. Dugang sa tabitabi, ang dugay o dili na ihatod ang resulta kon molapas na sa tulo ka adlaw sa kasinatian sa dakbayan sa Sugbo.
Hinuon, inisyatiba usab sa na-swab nga wa pay resulta nga nadawat sa pag-follow-up niini sa laboratoryo sa DOH. Apan dili ba usab kini kabahin sa responsibilidad sa mabuot nga contact tracing o kinatibuk-ang sistema sa Emergency Operations Center?
Ang yano nga molupyo, na-torture sa hunahuna samtang nagpaabot sa resulta.