KASONG pagsupak sa Section 4 in relation to Sec 7 sa Republic Act (RA) 7832 kun Anti-Pilferage of Electricity and Theft of Electric Transmission Lines/Materials Act of 1994 ang atubangon sa duha ka lalaki kinsa nasakpang nangontrata nga mag-illegal tapping sa kuryente.
Ang insidente nahitabo alas 4:15 sa hapon, Oktubre 15, 2021, didto sa Cuambugan Tagum City, Davao del Norte.
Sa report nasayran nga nasikop sa National Bureau of Investigation (NBI) Tagum City ang duha ka mga lalaki nga gipang-ila nga alyas Jojo, 44, ulitawo, electrician ug molupyo sa Purok Pag-asa, Visayan Village, Tagum City ug alyas Jan-jan, 43, minyo, lineman ug molupyo sa Purok 3 Kaputi-an, Malalag, Davao del Sur.
Subay sa impormasyon nga nadawat sa NBI-Tagum, dunay mga indibiduwal nga nangontrata og pag-tap sa kuryente nga ilegal gikan sa poste sa Northern Davao Electric Cooperative, Inc. (Nordeco).
Usa ka alyas Adam nagpuyo sa Cuambugan, Tagum City ang kliyente sa duha ka suspek niadtong mga orasa.
Pag-abot sa awtoridad, naaktuhan pa ang duruha nga mi-tap sa kuryente pinaagi sa ilang pagkatkat sa poste sa Nordeco.
Nagbahad ang Nordeco nga kasohan gayod nila ang mga masakpang ilegal nga nag-tapping og kuryente.
Gihan-ay na ang legal nga aksiyon nga gipahamtang batok sa mga dinakpan didto sa korte samtang ang duha ka mga suspek anaa karon selda sa NBI-Tagum. (Jeepy P. Compio)