KIDAPAWAN CITY -- Panulis ang gilantaw nga motibo sa mga awtoridad sa pagpusil patay sa konduktor sa bus alas 2:10 sa hapon niadtong Sabado, Oktubre 16, 2021.

Ang biktima mao si Norodin Sampegat Tigkanan, 36, minyo, konduktor sa Mindanao Star Bus ug nagpuyo sa Barangay Poblacion 7, Cotabato City.

Gikanayon ni Aleosan Chief of Police Captain Arvin John Cambang nga nagdagan ang nahisgutang bus gikan sa Davao City paingon unta sa Siyudad sa Cotabato.

Apan pag-abot sa bus sa Barangay Pagangan, Aleosan, North Cotabato tulo ka pasahero ang mipara. Sa dihang mosakay na unta, gipusil ang biktima ang kalibre .45 nga pistola.

Gikuha sa mga suspek ang koleksiyon nga kuwarta sa konduktor nga nagkantidad og P9,100. Una miikyas, gipusil pa sa mga suspek ang closed-circuit television (CCTV) camera sa bus.

Mga suspek daling mikabayo sa duha ka motorsiklo daplin sa national highway ug miiktad paingon sa hilit nga dapit sa lungsod.

Hinuon, laing gihilabtan nga mga suspek gawas sa konduktor kon diin nagtinguha lang sa nakolekta niining kuwarta.

Gisubay na sa kapulisan sa Aleosan Municipal Police Station ang hitabo aron nga matumbok ang mga suspek ug madakpan. (Edgar E. Fuerzas)