KON wala madakpan lagmit makapaak ang usa ka python nga bitin nga binuhi sa usa ka residente sa Siyudad sa Mati sa Davao Oriental.

Alas 3:49 Dominggo sa kaadlawon, Oktubre 17, 2021, natugaw ang pagkatulog sa mga residente sa Balintong, Barangay Central human nakabuhi ang usa ka python nga bitin ug perte niining tago sa suok nga bahin sa usa ka balay.

Dali sab dayon nga miresponde ang mga sakop sa City Disaster Risk Reduction Management Office sa siyudad hinungdan nga nadakpan ang bitin.

Apan sa wala pa kini hingpit nga nadakpan, naglisod sila og kuha niini sanglit perteng tago sa suok nga bahin sa balay hinungdan nga ila na lamang gibira ang ikog.

Nasamad pa og gamay ang lawas sa bitin gumikan sa pagpugos sa mga rescuers sa pagbira niini.

Sumala sa tag-iya sa bitin nga iya na kining dalhon sa ilang farm sa Calapagan aron di na mahitabo ang insidente basin unya makapaak na kini.

Hinuon mapasalamaton ang tag-iya nga naluwas ang iyang binuhing bitin ug nagsaad sa awtoridad nga iseguro na niini ang kulongan nga di gyod makabuhi. (Jeepy P. Compio/CIO Mati City)