MORA og gidat-ogan sa kalibutan ang usa ka bana nga taga Compostela sa dihang iyang nadiskobrehan nga ang iyang asawang maestra duna nay gikulokadidang nga laing lalaki kinsa mas batan-on pa kaysa kaniya.
Nahitabo ang pagkadiskobre ni alyas Hulyo, 37, mag-uuma ug molupyo sa Barangay Poblacion sa nahisgutang lungsod alas 10:50 sa buntag niadtong Biyernes, Oktubre 15, 2021.
Tungod niini, wala maglangay ang bana, daling midangop ngadto sa Compostela Municipal Police Station (MPS) ug mitaho sa pagpangluib sa iyang asawa nga si alyas Alona, 37, magtutudlo sa publikong tunghaan.
Nasayran nga nagpuyo na diay si alyas Alona ug si alyas Alden, 25, ulitawo, nagtrabaho isip "cook" ug nag-ipon sa usa ka boarding house sa sentrong bahin sa lungsod.
Tungod niini, wala maglangan ang bana, gipadakop ang duruha sa pulis.
Mismong kapulisan sa Compostela MPS nakasaksi mismo sa panag-ipon sa mga nahisgutan sa dihang giadtoan ang boarding house nga giingong gi-estaran sa duruha.
Gipangdakop gilayon sa mga pulis sila alyas Alona ug alyas Alden ug gipangbalhog sa selda sa Compostela MPS.
Gipaabot sa kapulisan nga mopasaka og kaso ang bana nga grabeng naguol kay nagmata lang siya og buntag kay nakakaplag na diay og laing nilalang ang iyang asawang maestra.