ORMOC CITY - Duha ka mga binilanggo sa Biliran Provincial Jail ang nasakpan nga nagsuyop og shabu sud sa selda, alas 6 sa gabii, Huwebes, Oktubre 14, 2021.

Giila ang duha ka binilanggo nga sila si Joel Dela Peña, 30, ug Antonio Villena Jr, 49, pulos taga Naval, Biliran.

Matod sa report sa kapulisan, nakadawat sila og tawag sa telepono bahin sa maong insidente.

Sa ilang pagsusi sa bilanggoan, ilang naaktohan ang duha nga naggamit og ginadiling drugas.

Matod ni Police Major Michael John Astorga, ila pa karon gisusi giunsa pagpalusot sa kontrabando ug gisubay tanan anggulo sa pagsud sa shabu.

Ang duha naa sa kustodiya sa kapulisan sa Naval ug gipasakaan og dugang kaso kalapasan sa Republic Act 9165. (JKDP)