Amahan nga vice squad leader sa New People's Army (NPA) nga naglihok sa bukirang mga barangay sa lungsod sa Santa Catalina, Negros Oriental uban sa duha ka anak ang ningtahan sa Regional Mobile Force Battalion (RMFB) 7.
Ang amahan mao si Reynald Paculanang, 53, mag-uuma, ug ang duha niya ka anak nga mga sakop sa Yunit Militia sa NPA nga silang Emmanuel, 27, ug Juniver Fermin, 2, taga Sitio Nahayag, Barangay Talalak sa Santa Catalina.
Lakip sa gitahan ang usa ka M14 singlebolt action ug mga bala niini nga matod pa, ilang gigamit sa ilang pagpangataki sa mga sundalo ug mga pulis.
Matod ni Police Colonel Robert Lingbawan, battalion commander sa RMFB 7, nitahan ang amahan ug mga anak tungod sa subsob nga law enforcement ug major combat military operation sa Barangay Nagbinlod ug Talalak nga usa sa dapit nga adunay presensya sa NPA sa Negros Oriental.
Nakadawat silag intelligence information nga adunay sakop sa Communist NPA Terrorist Group nga naglihok sa maong mga barangay nga ubos sa Rachel Mae Palang Command sa South East Front.
Nakig-alayon dayon ang RMFB 7 pinaagi ni Police Major Epream Paguyod sa 11TH Infantry Battalion Philippine Army, Regional Intelligence Division 7 ug sa Negros
Oriental Police Provincial Office alang na sa pagtabang nga matigayon ang magtahan sa maong mga sakop sa NPA.
Dugang ni Lingbawan nga ang mga barangay Talalak ug ang Nagbinlod giila kaniadto nga kampohanan sa mga sakop sa NPA nga gitawag nila South East Front.
Apan sa dihang gipatuman sa gobyerno ang programang Task Force End Local Communist Armed Conflict daghan ang mitahan sa ilang kaugalingon tungod kay matod pa naka benepisyo sa tabang sama sa panginabuhian niini.
Dugang ni Lingbawan, daghan pa ang wala motahan nga naa lang sa maong mga barangay ug padayon nga naglihok sa armadong pakigbisog.
“'Yang area kasi ng Santa Catalina na ‘yan di ba yan yung teritoryo ng southeast front, na-declare na yan last October ng armed forces tsaka sa PNP na clear although may mga remnants, ngayon may information kami although subject for validation na nag- re-recover na naman sila sa area, hindi man kasi na ubos yung member ng south east front may mga naiwan pa dyan,” matod ni Lingbawan.
Gihulagway ni Lingbawan nga kadaugan sa gobyerno ang pagtahan sa amahan ug duha niya ka anak sa
sabakan sa balaod sanglit taas nga combat official sa NPA ang nitahan.
Nakahukom ang tulo nga motahan na lang tungod kay gipangkapoy na sila sa ilang sitwasyon tungod kay padayon ang ilang pagdagan sa bukid nunot sa walay hunong nga operation sa gobyerno.
Gisaad ni Lingbawan nga tabangan nila ang tulo nga makadawat og financial assistance gikan sa gobyerno ug hatagan usab nila kinig proteksyon nga dili kuoton sa mga NPA. (AYB)